Padlangs Huistoe Maandag Boodskap
Johannes 15:13 – Groter liefde het niemand as dit nie, dat iemand sy lewe vir sy vriende gee.
Elke keer as ek aan Jesus dink, en veral aan Sy dood op Golgota, word ek aan Sy oneindige liefde herinner. As ek dink aan die bloed wat van sy rug, kop, hande en voete gevloei het, sukkel ek om die volle omvang van sy liefde te begryp.
Dan word ek herinner aan ‘n gesegde: ‘Die Evangelie is vry (gratis), maar dit kos alles wat jy het.’ Toe God sy eniggebore Seun gegee het, het Hy ons vrygekoop; Hy het die volle prys vir ons redding betaal. Jesus het Sy alles gegee, en nou, in ruil daarvoor, moet ons Hom ons alles gee.
Christendom is meer as ‘n lys van gebeure. Dit is meer as oggend- en aandgebede, meer as om een, twee of selfs drie keer per week kerk toe te gaan. Die Christendom is meer as om die blokkie langs Christen te merk elke keer as ons gevra word watter godsdiens ons beoefen.
Christendom is ‘n lewenstyl wat deur die Heilige Gees beïnvloed word om ‘n Christusopenbarende lewe of ‘n lewe soos Christus te leef. Christen wees vereis volle en volledige oorgawe, selfs tot die dood. Maar dit is nie ‘n wettiese vereiste nie. Dit is nie so dat ons moet gee bloot omdat Hy gegee het nie. Ons oorgawe moet spruit uit ‘n hegte verhouding met die Here en ons liefde vir Hom. En dit beteken dat ons die volle prys moet betaal, ons lewens aan Hom moet gee en die ou self of ou natuur moet afsterf.
Jesus het vir ons gesterf. Is ons bereid om dieselfde te doen? Is ons bereid om die ou lewe van sonde en ongeregtigheid af te lê? Is ons bereid om die dinge van die verlede prys te gee? Is ons bereid om ou gewoontes te laat vaar?
Daar staan geskrywe: ‘Of julle dan eet of drink of enigiets doen, doen alles tot verheerliking van God.’ (1 Korintiërs 10:31) Hierin lê ware Christendom – dat God in ons en deur ons verheerlik word. Net so staan daar geskrywe: “ As iemand spreek, laat dit wees soos woorde van God; as iemand dien, laat dit wees soos uit die krag wat God verleen, sodat God in alles verheerlik kan word deur Jesus Christus, aan wie die heerlikheid en krag toekom tot in alle ewigheid. Amen. ”(1 Petrus 4:11)
Volle oorgawe beteken om ‘n lewe vol van Christus te leef, onsself te verloën of prys te gee en elke dag ons kruis op te neem. (Lukas 9: 3) Om Christen te wees, beteken dat ons alles wat ons doen, of ons eet, drink of praat, tot eer van God is.
Jesus het alles gegee! Ons moet alles gee. Is ons bereid om dit te doen?
